Մահվան ելքով վրաերթ Երևանում. 30-ամյա վարորդը Nissan-ով վրաերթի է ենթարկել հետիոտնին. վերջինս տեղում մահացել է. ՖՈՏՈՌԵՊՈՐՏԱԺ

Այսօր՝ հուլիսի 24-ին, մահվան ելքով վրաերթ է տեղի ունեցել Երևանում: Ժամը 21:40-ի սահմաններում, Երևանի բնակիչ, 30-ամյա Դավիթ Հ.-ն՝ իր վարած Nissan Tiida մակնիշի ավտոմեքենայով, Աճառյան փողոցում՝ «Հարսնաքար» ռեստորանային համալիրի հարևանությամբ, վրաերթի է ենթարկել փողոցը չթույլատրելի հատվածով անցնող տղամարդ հետիոտնի:

Ինչպես դեպքի վայրից հայտնում է ֆոտոլրագրագրող Գագիկ Շամշյանը, վարորդը փախուստի չի դիմել, ահազանգել է շտապօգնություն, փորձել է օգնություն ցուցաբերել վրաերթի ենթարկվածին, սակայն օպերատիվորեն ժամանած բժիշկների հերթապահ խումբը արձանագրել է հետիոտնի մահը:

Օպերատիվորեն ժամանել են ՀՀ ոստիկանության Պարեկային ծառայության Երևանի գնդի պարեային ծառայության ավագ տեսուչ Հարությունն Գրիգորյանը, 1-ին գումարտակի 2-րդ վաշտի հրամանատար Նիկոլայ Ավետիսյանը և 3-րդ գումարտակի հրամանատարի տեղակալ Ալբերտ Հովհաննիսյանը:

Տեղում ուժեղացված ծառայություն են կատարել 1-ին գումարտակի 2-րդ վաշտի ավագ պարեկներ Ռազմիկ Ղարիբյանը, Դավիթ Սիմոնյանն ու կրտսեր պարեկ Արմեն Ավետիսյանը, որպեսզի հետաքրքրասեր վարորդները մեքենաները չկայանեն և խցանում տեղի չունենա, ինչը պարեկներին հաջողվել է: Վրաերթի մասին Պարեկային ծառայության Երևանի գնդից տեղեկությունը փոխանցել են Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային քննության բաժին, որտեղից ժամանել է քննչական խումբը՝ բաժնի պետ Գոռ Թադևոսյանի, բաժնի պետի տեղայկալ Սամվել Սամվելյանի և քննիչ Վարդան Բաղդասարյանի գլխավորությամբ:

Դեպքի փաստով Վ. Բաղդասարյանի կողմից նախաձեռնվել է քրեական վարույթ: Վարորդը տեղում ենթարկվել է սթափության փորձաքննության, նա եղել է սթափ: Քննիչի հանձնարարականով ավտոմեքենան տեղափոխվում է պարեկային ծառայության Երևանի գնդի պահպանվող հատուկ տարածք: Ֆոտոլրագրողը հայտնում է, որ քիչ առաջ դեպքի վայր ժամանեցին նաև Պարեկային ծառայության Երևանի գնդի հրամանատար Անդրանիկ Իսախանյանն ու ոստիկանության Ավանի բաժանմունքի պետը: Պարեկային ծառայությունն ու քննչական բաժինը պարզում են մահացածի ինքնությունը:

Լուսանկարները՝ Գագիկ Շամշյանի

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Կարող եք կիսվել սոց․ ցանցերում