Դիետաներին հետևելու ընթացքում մարդիկ հաճախ դժվարանում են դիմակայել սաստիկ քաղցին ու որևէ բան ուտելու ցանկությանը, ինչն էլ սովորաբար դառնում է սննդակարգի անարդյունավետության պատճառը, սակայն սննդաբան Լյուդմիլա Բաբիչը նշել է այն ըմպելիքները, որոնք կօգնեն հաղթահարել այս խնդիրը:
Սննդաբանի խոսքով՝ ժողովրդական բժշկության մեջ կան հարյուրավոր բաղադրատոմսեր, որոնք նախատեսված են քաղցի զգացումը մեղմելու համար, սակայն հարկ է հիշել, որ ոչ բոլոր բույսերն է կարելի օգտագործել առանց բժշկի թույլատվության: Պետք չէ մոռանալ, որ ինչպես դեղամիջոցները, այնպես էլ դեղաբույսերն ունեն հակացուցումներ, ուստի հարկավոր է միշտ հաշվի առնել օրգանիզմի առանձնահատկությունները, առկա հիվանդություններն ու այս կամ այն նյութի նկատմամբ անհանդուրժողականությունը:
Այնուամենայնիվ կա մի պարզ ու անվտանգ բաղադրատոմս, որը կօգնի ճնշել ախորժակն ու ազատվել քաղցի զգացումից: Պարզապես հարկավոր է մի բաժակ եռացրած գոլ ջրին ավելացնել մեկ թեյի գդալ մեղր ու մի փոքր կիտրոնի հյութ, լավ խառնել ու խմել ստացված ըմպելիքը: Լյուդմիլա Բաբիչի խոսքով՝ այս համեղ ու օգտակար ըմպելքին օրական երեք անգամ խմելու դեպքում կարելի է հարստացնել օրգանիզմը կարևոր միկրոտարրերով, ազատվել քաղցի զգացումից և խթանել ճարպերի այրման ու օրգանիզմի ինքնամաքրման գործընթացները:
Բացի այդ, բուժարարները խորհուրդ են տալիս նաև ուշադրություն դարձնել խատուտիկի տերևների, լվածաղկի (пижма) ծաղիկների և եզան լեզվի թուրմերին: Այս բույսերը կարելի է ձեռք բերել դեղատներից, սակայն հարկ է հիշել, որ նման թուրմերը պատրաստելիս անհրաժեշտ է հետևել տուփի վրա նշված հրահանգներին ու չգերազանցել չափաբաժինները:
Բացի այդ, քաղցից ազատվելու հիանալի միջոց են նաև հապալասի թուրմն ու լոռամրգի մորսը, սակայն այս ըմպելիքները պետք է լինեն առանց շաքարավազի:
Այնուամենայնիվ ըմպելիքներն ախորժակը վերահսկողության տակ պահելու միակ միջոցը չեն: Շատ արդյունավետ կարող է լինել նաև արոմաթերապիան: Մասնագետների խոսքով՝ թեյի ծառի, կիտրոնի ու անանուխի եթերայուղերը, ինչպես նաև մերկասերմերի հյութահանուկները ոչ միայն հաճելի բույր կտարածեն տանը, այլև կազատեն քաղցի զգացումից:
