Հեռուստահաղորդավար Պետրոս Ղազարյանը տեսանյութ է հրապարակել՝ խոսելով նախօրեին ընդդիմության հրավիրած հանրահավաքից և դրա առաջնային թեզից:
«Սա ոչ թե ընդդիմության միասնական հանրահավաքն էր, այլ ՀՅԴ հանրահավաքն էր և ճիշտ ժամանակն է Դաշնակցությանը հարց ուղղել՝ Արցախը հետ եք բերելու Արևմտյան Հայաստանը հետ բերելուց առա՞ջ, թե՞ հետո»,- հարց է ուղղել նա:
Ըստ Ղազարյանի՝ Դաշնակցությունը 100 տարի իր գոյությունը պայմանավորել է Արևմտյան Հայաստանը հետ բերելու թեզով:
«Իսկ սխեման շատ պարզ էր․ եթե մի օր փլուզվել է Խորհրդային Միությունը, կփլուզվի նաև Թուրքիայի Հանրապետությունը, ու այդպես ՀՅԴ-ն հետ կբերի Արևմտյան Հայաստանը: Հիմա Արցախը փրկելու սխեման նույնն է․ մի օր կփլուզվի Ադրբեջանի Հանրապետությունը»,- նշել է Ղազարյանը:
