Ուկրաինայում Ռուսաստանի զինված ուժերի ստորաբաժանումները հարձակողական գործողություններ են իրականացնում լայն ճակատում. այսօր կայացած ճեպազրույցում հայտարարել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը, փոխանցում է «Ինտերֆաքս»-ը։
«Վերջին մեկ օրվա ընթացքում հսկողության տակ են վերցվել Պրեոբրաժենկա, Կոմսոմոլսկոյե, Զագորնոյե, Դորոժնյանկա, Ռեշետիլովսկոյե, Կոնստանտինովկա, Շևչենկո, Չուբարևկա, Պրոլետարսկոյե, Լյուբիմովկա բնակավայրերը»,- ասել է Կոնաշենկովը։
Կոնաշենկովի խոսքով՝ ուկրաինական Մարիուպոլի շուրջ շրջապատումը շարունակում է նեղանալ։ Կոնաշենկովը նաև ասել է, որ Ուկրաինայում «հատուկ գործողության» ընթացքում ռուսական զինուժը խոցել է 2037 ռազմական ենթակառուցվածքի օբյեկտ։
«Դրանց թվում են Ուկրաինայի զինված ուժերի 71 հսկիչ կետերը և կապի կենտրոնները; 98 S-300, Buk M-1 և Osa զենիթահրթիռային համակարգեր, ինչպես նաև 61 ռադիոտեղորոշիչ կայան»,- հայտնել են ռուս զինվորականները։
Կոնաշենկովի խոսքով՝ ոչնչացվել են նաև 66 ինքնաթիռ՝ ցամաքում և 16 օդանավ, 708 տանկ և այլ զրահատեխնիկա, 74 բազմակի հրթիռային կայանք, 261 դաշտային հրետանի և ականանետ, 505 միավոր հատուկ ռազմական տեխնիկա, ինչպես նաև 56 անօդաչու թռչող սարք։ Զինվորականները Ժիտոմիրում ոչնչացրել են Javelin և NLOW հակատանկային հրթիռային համակարգերով մեծ պահեստ։
ՌԴ ռազմական գերատեսչությունը նշել է, որ ռուսական զինված ուժերը շարունակում են հարվածներ հասցնել Ուկրաինայի ռազմական օբյեկտներին։
Ռուսաստանի պաշտպանության նախարարությունը չի հայտնել սեփական կորուստների մասին։
