Ուկրաինայի նախագահ Վլադիմիր Զելենսկին հայտարարել է, որ պատրաստ է ռուսական կողմի հետ բանակցությունների ընթացքում որոշակի փոխզիջումների գնալ։
Այս մասին հայտնում է ՏԱՍՍ-ը։
Հարցին, թե պատրաստ է արդյոք Ղրիմը ճանաչել որպես Ռուսաստանի մաս, իսկ Դոնբասի հանրապետությունները՝ որպես անկախ պետություններ, Զելենսկին պատասխանել է.
«Հարցն այն չէ, թե ես ինչ կարող եմ անել: Ցանկացած երկխոսության ժամանակ իմ նպատակը Ռուսաստանի հետ պատերազմի ավարտն է»։
Դրա համար, ուկրաինացի առաջնորդի խոսքով, ինքը պատրաստ է «որոշակի քայլեր ձեռնարկել»։
«Պատրաստ եմ բանակցել, պատրաստ եմ փոխզիջման: Բայց դրանք չեն կարող դավաճանություն լինել իմ ժողովրդին»,- շարունակել է Զելենսկին՝ նշելով, որ ռուսական կողմը նույնպես պետք է պատրաստ լինի փոխզիջումների։
«Նախագահների միջև դեռ շփում չի եղել, և մենք կարող ենք դադարեցնել այս պատերազմը միայն երկու նախագահների միջև ուղիղ բանակցությունների միջոցով»,- եզրափակել է նա։
