Ավտոբուսն ունեցել է տեխնիկական անսարքություն՝ յուղի արտահոսք դեպի արտանետման համակարգ, ինչն էլ ծխի պատճառ է դարձել: Վարորդին նկատողություն է հայտարարվել։
Ասել է «Երևանի ավտոբուս»-ի տնօրեն Բեգլար Կիրակոսյանը` անդրադառնալով Երևանում ուժեղ ծխարձակելով երթևեկող ավտոբուսին։
Երեկ հրապարակել էինք դերասան և երգիչ Գարիկ Պապոյանի ինսթագրամում հրապարակած տեսանյութը։
«Էս ինչքան տերև է վառում այս ավտոբուսը»,- գրել էր Պապոյանը՝ հումորով անդրադառնալով Երևանում օդի աղտոտվածությանը: Տեսանյութում երևում է՝ ինչպես է Երևանում ընթանում առատ ծուխ արձակող ավտոբուսը:
Հիշեցնենք, որ Երևանի քաղաքապետ Տիգրան Ավինյանը նոյեմբերի 24-ի գործակարգավարական նիստի ժամանակ անդրադարձել է մայրաքաղաքում օդի աղտոտվածության խնդրին՝ առանձնացնելով բակերում տերևների և աղբի այրման վնասակար ազդեցությունը։ Նա նշել է, որ այդ նյութերի այրումից առաջացած վնասը գերազանցում է անգամ շինարարական փոշու ազդեցությանը։
