Այսօր՝ նոյեմբերի 21-ին, հերթական ողբերգական դեպքն է տեղի ունեցել բեռնատար գնացքի և ավտոմեքենայի բախման հետևանքով:
Ժամը 06:30-ի սահմաններում Սիս բնակավայրի վարչական տարածքում բախվել են «Opel» մակնիշի ավտոմեքենան և Գյումրի-Երևան բեռնափոխադրումներ իրականացնող բեռնատար գնացքը:
Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով «Opel»-ը հայտնվել է դաշտում:
Դեպքի վայր են ժամանել ՀՀ ներքին գործերի նախարարության փրկարար ծառայության Մասիսի հրշեջ-փրկարարական ջոկատից 1 մարտական հաշվարկ:
Ժամանել են նաև ՀՀ ՆԳՆ ոստիկանության պարեկային ծառայության Արարատի մարզի գումարտակի 2-րդ վաշտի 1-ին դասակի պարեկները՝ գումարտակի հրամանատար Գևորգ Զաքարյանի, գումարտակի հրամանատարի տեղակալ Աբել Վարդանյանի, գումարտակի ծառայության ավագ տեսուչ Սահակ Թադևոսյանի գլխավորությամբ:
Ֆոտոլրագրողը հայտնում է, որ նշված հատվածում պետք է լինեին ուղեփակոցներ, սակայն այն բացակայում է, «Հարավկովկասյան երկաթուղի» ընկերությունը բավարարվել է 1 հատ ցուցանակ տեղադրելով, մինչդեռ այս ողբերգական դեպքի մեջ նաև իրենց մեղքի բաժինն ունեն և՛ «Հարավկովկասյան երկաթուղի» ընկերությունը, և՛ հավանաբար, Արարատի մարզպետարանը:
